Sheila Guo may Chinese passport, ipade-deport ng BI

MANILA, Philippines — Ipade-deport ng Bureau of Immigration (BI) ang kapatid ni dismissed Bamban, Tarlac Mayor Alice Guo, na si Sheila Guo, matapos na matuklasang mayroon rin itong Chinese passport habang posible umanong nasa Indonesia pa si Alice.

Sa inilabas na mugshot ng BI, pinangalanan nito si Sheila Guo, sa kanyang Chinese name na ‘Zhang Mier.’

Ayon kay BI Spokesperson Dana Sandoval, natuklasan nila na si Sheila ay mayroon ring Chinese passport, bukod sa kanyang Philippine passport.

Balido aniya ang Chinese passport ni Sheila hanggang 2031.

Ipade-deport umano nila si Sheila dahil sa misrepresentation at pagiging undesirable alien.

Naniniwala rin ang BI na si Sheila ay banta sa public safety, public interest at national security.

Kaugnay nito, napag-alaman umanong posibleng gumamit din sina Guo ng ‘backdoor’ para makalabas ng bansa matapos makitaan ng entry sa Sabah.

Si Sheila, kasama si Cassandra Li Ong, ay ibinalik na sa bansa kamakalawa matapos maaresto sa Indonesia. Hindi nila kasama si Alice Guo nang sila ay arestuhin.

“With regards to the movement of Alice Guo, ang huli nating alam, nandoon pa siya sa Indonesia, still no attempts na umalis ng bansang iyon,” ani Sandoval.

Sina Sheila at Ong ay dumating sa NAIA Terminal 1 dakong alas-5 ng hapon mula sa Jakarta, kasama ang mga operatiba ng Intelligence Division (ID) at Fugitive Search Unit (FSU) ng BI.

Samantala, isinailalim na ng National Bureau of Investigation (NBI) Special Task Force division sa inquest proceedings sina Guo at Ong. Kasong paglabag sa Obstruction of Justice at Harboring of fugitive ang isinampa laban sa dalawa.

Kahit ‘bailable’ ang kaso ng mga ito ay mananatili sila sa kustodiya ng NBI dahil may pending na warrant of arrest ang Senado at Kamara laban sa dalawa.