Kamara nakatutok sa panukalang NHRHMP

MANILA, Philippines — Sinimulan na ng House Committee on Health ang deliberasyon para sa pagmonitor ng implementasyon ng panukalang National Human Resources for Health Master Plan (NHRHMP) 2020-2040.

Sa House Resolution 461 na inihain ni Quezon 4th District Rep. Keith Micah “Atty. Mike” D.L Tan, iginiit niya ang kahalagahan na maipatupad ng maayos ang NHRHMP dahil ito ay nasa mandato ng Republic Act 11223 o ang Universal Health Care Act.

Giit pa ni Tan sa ilalim ng batas, ang Department of Health (DOH) ang titiyak sa formulation at implementation ng NHRHMP dahil ito ang nagbibigay ng polisiya at stratehiya para sa tamang generation, recruitment, restraining, regulation, retention at reassessment ng health workforce base sa population health needs.

Anya, ang NHRHMP ay naglalayon na tugunan ang sustainability ng health sectors lalo na ang bilang ng mga nurses, medical technologies, doctors at iba pang healthcare workers sa bansa.

“Natutuwa tayo na muling nabuksan ang usapin para sa pagsusulong ng kagalingan ng human resources for health (HRH) ng bansa tulad na lamang ng isyu para sa pagbibigay ng sapat na sahod at maayos ang kondisyon sa pagtatrabaho,” ayon pa kay Rep. Tan.