Sen. Cynthia Villar gustong mag-mayor sa 2025 elections

MANILA, Philippines — Nais ni Senador Cynthia Villar na tumakbong mayor ng Las Piñas sa May 2025 elections.

Ayon kay Villar, nais niyang tumakbong mayor bagaman at gusto ng kanyang asawang si dating Senator Manny Villar na tumakbo siyang congresswoman.

“Gusto kong mag-mayor. Si Senator Villar gusto niya mag-congresswoman ako,” ani Villar.

Pero tiniyak ni Villar na sa kanilang mag-asawa ay siya ang masusunod sa huli.

Inaasahang makakalaban ni Villar ang kanyang pamangkin na si incumbent Vice Mayor April Aguilar.

Sinabi ni Villar na gusto niyang maging mayor dahil sa tingin niya ay malaki ang maitutulong niya sa Las Piñas bagaman at tingin aniya ng kanyang asawa ay mas may “value” siya sa Congress.

Pero nilinaw din ni Villar na ikokonsidera niya ang opinyon ng kanyang asawa at malalaman ang pinal na desisyon sa paghahain ng certificate of candidacy sa Oktubre.

Binanggit din ni Villar na marami siyang lokal na proyekto sa Las Piñas.