Pangulong Marcos bumuo ng task force vs oil spill sa Bataan

MANILA, Philippines — Lumikha si Pangulong Ferdinand Marcos Jr. ng isang inter-agency task Force para mapabiis na tugunan ang posibleng epekto ng oil spill mula sa Motor Tanker Terra Nova na lumubog sa baybayain ng Limay, Bataan sa kasagsagan ng bagyong Carina at Habagat nitong Huwebes.

Ang task force ay pangungunahan ng Office of the Civil Defense (OCD) katuwang ang Department of Environment and Natural Resources (DENR), Philippine Coast Guard (PCG), at Department of Interior and Local Government (DILG).

Kasama rin sa task force ang DOH, DOLE, at DSWD.

Inatasan naman ng Pangulo ang DENR, na makipagtulungan sa DOH para magsagawa ng kailangang pagsusuri sa kalidad ng tubig at hangin sa apektadong lugar.

Dapat aniyang masuri ng DOH ang kalusugan ng mga residente doon na apektado ng oil spill.

Inatasan din ang DOLE na magpatupad ng mga programang pangkabuhayan para sa naapektuhang residente gayundin ang DSWD para magbigay ng tulong sa mga biktima.

Sinabi ng Pangulo na kinakailangan ding makipagtulungan sa mga non-government organizations upang matugunan ang problema at sa local government units.

Lumubog malapit sa Liway, Bataan ang MT Terranova kung saan pinapangambahan ng Philippine Coast Guard (PCG) ang pagsirit ng 1.4 milyong litro ng industrial fuel sa katubigan.

Sinabi ni PCG spokesperson Rear Admiral Armand Balilo na mayroong malaking panganib ang oil spill dahil malapit lang ito sa Manila Bay.