Pangulong Marcos kay Quiboloy: Magpakita ka, sundin ang batas!

MANILA, Philippines — Hinamon ni Pangulong Ferdinand “Bongbong” Marcos Jr. si Kingdom of Jesus Christ  (KOJC) founder Pastor Apollo Quiboloy na lumantad para harapin ang mga akusasyon laban sa kanya.

Tugon ito ng Pangulo matapos na hingan ng reaksyon tungkol sa pagkwestyon ng kampo ni Quiboloy sa motibo ng mga pribadong indibidwal na nag-alok ng P10 milyon sa anumang impormasyon na makakapagturo sa kinaroroonan ng lider para maaresto.

Sagot naman ni Pangulong Marcos, sinusunod ang nila ang batas, kaya dapat din sundin ng kampo ni Quiboloy ang batas.

“Bakit lagi kami kinukuwestiyon? Sinusundan lang namin ang batas. Sundin din niya ang batas. ‘Yun lang,” ayon kay Marcos.

Si Quiboloy ay inakusahan  ng child abuse at human trafficking at iba pang kaso ng mga dating miyembro ng KOJC na pinabulaanan naman nito.

“He can question their motives as much as they want. But magpakita siya. I question his motives. Let me question his motives,” sinabi pa ni Marcos.

Nauna na rin inamin ni dating pangulong Rodrigo Duterte na alam niya ang kinaroroonan ni Quiboloy subalit hindi niya ito sasabihin.