Fact-finding committee binuo vs kandidatura ni Alice Guo

MANILA, Philippines — Pinaiimbestigahan na rin ng Commission on Elections (Comelec) ang kandidatura ng suspendidong alkalde ng Bamban, Tarlac na si Alice Guo, na isinasangkot sa operasyon ng POGO at hinihinalang isang Chinese national.

Batay sa Memorandum na may petsang Hulyo 6, 2024, inatasan ni Comelec Chairman George Erwin Garcia ang Comelec Law Department upang bumuo ng isang fact-finding committee na mag-iimbestiga sa kandidatura ni Guo noong 2022 National and Local Elections.

“In view of public interest in the controversy surrounding Bamban, Tarlac Mayor Alice Guo, you are directed to create a Fact-finding Committee to investigate her candidacy for the 2022 National and Local Elections,” anang kautusan, na naka-address kay Director Maria Norina Tangaro-Casingal, ng Comelec Law Department.

Aalamin ng komite kung nagkaroon nga ba ng material misrepresentation sa certificate of candidacy (COC) na maaaring magresulta sa paghahain ng election offense case laban kay Guo.

Maaari rin umano nitong ipag-utos ang pagsasagawa ng technical analysis sa mga dokumento na nagtataglay ng fingerprints ng mga rehistradong botante, na may pangalang Alice Guo, upang tukuyin ang kanyang pagkakasala, kung mayroon man.