Pangulong Marcos: K-12 ‘di epektibo, repasuhin

MANILA, Philippines — Ipinag-utos ni Pangulong Ferdinand Marcos Jr. kay incoming Education Secretary Sonny Angara na muling pag-aralan ang K-to-12 program.

Ito ay dahil naniniwala ang Pangulo na hindi naging epektibo ang kakayahang magtrabaho o hindi naging maganda ang resulta ng employability ng mga estudyante na dumaan sa pagdaragdag ng 2 taon sa high school ng Department of Education (DepEd).

“Pero kung titingnan natin ang naging resulta, hindi tumaas, hindi gumanda ang employability nila. So we have to do something else. Kaya we were examining things like mini-courses, 3-6 buwan, 1 year-short courses para sa mga specialty,” ayon pa kay Marcos.

Sa ngayon ang kailangan lang aniya ay makipag-ugnayan sa pribadong sektor para mabigyang garantiya ng supply ng skilled workers.

“So tinitiyak namin na paglabas na may magandang pagasa, magandang magkatrabaho if not directly already to an industry employer,” pahayag pa ng Pangulo.

Inatasan din ng Pa­ngulo si Angara na tutukan ang resulta ng mga estudyante sa international objective test lalo na sa STEM subjects dahil dito bumabagsak ang Pilipinas.

Matatandaan na isa si Angara sa mga may akda na nagsulong ng batas ng K-to-12.