Angara, bagong DepEd chief

MANILA, Philippines — Itinalaga ni Pangulong Ferdinand “Bongbong” Marcos Jr. si Senador So­nny Angara bilang bagong kalihim ng Department of Education (DepEd) kapalit ni Vice-President Sara Duterte na nagbitiw sa puwesto noong Hunyo 19.

Sinabi ng Presidential Communications Office (PCO) na magiging epektibo ang appointment ni Angara sa Hulyo 19.

Ang anunsiyo ay ginawa ni Pangulong Marcos sa ika-17 Cabinet meeting sa Palasyo ng Malakanyang kahapon.

Sinabi ng Pangulo na tinanggap ni Angara ang alok na maging DepEd secretary.

“Sonny has agreed to take on the brief of the Department of Education,” pahayag ni Marcos.

Si Angara ay kilala bilang tagapagtaguyod ng edukasyon ng bansa.

Nagtapos ang senador sa Master of Laws sa Harvard University, Bachelor of Laws sa University of the Philippines, at Bachelor of Science in Economics sa London School of Economics.

Nagpasalamat naman si Angara sa tiwala ni Pa­ngulong Marcos.

“I am committed to working with all sectors of society, including my predecessor, Vice President Sara Duterte, to ensure that every Filipino child has access to quality education. I look forward to building upon her accomplishments,” pahayag pa ni Angara.