‘Wag kayong kumagat’ — Duterte
Sa pagtakbo sa Senado kasama 2 anak
MANILA, Philippines — Itinanggi ni dating Pangulong Rodrigo Duterte na tatakbo siya sa Senado kasama ang mga anak na sina Davao City Mayor Sebastian Duterte at Davao City Congressman Paolo Duterte.
Sa ulat ng ABS-CBN, sinabi ni Duterte na hindi dapat “kumagat” sa pahayag ng kanyang anak na si Vice President Sara Duterte na tatlong Duterte ang tatakbo sa 2025 senatorial elections.
“Maniwala kayo kay Inday? I-jamming ka niyan nang husto... Saan ka nakakita, tatay dalawang anak magtakbo [sa Senado]... ‘Wag kayong kumagat kay Inday kasi ‘yan si Inday kagaya ko rin ‘yan,” ani Duterte noong Linggo.
Kinumpirma ni Vice President Duterte Noong Hunyo 25 na ang kanyang ama at dalawang kapatid na sina Baste at Paolo ay tatakbo sa pagka-senador sa 2025, base umano sa sinabi ng kanyang ina.
Ipinahiwatig naman ng dating pangulo na wala silang gagawing mag-aama sa Senado.
“Anong gagawin namin sa Senate...Anong gagawin namin doon?” ani Duterte.
Tiniyak din ng dating Pangulo na hindi na siya babalik sa pulitika.
Laos na aniya siya at wala na ring pondo para tumakbo.
“Hindi na ako babalik ng politika. Tapos na po ako. Laos na ako. Wala na akong panggastos, wala na lahat. Ang naiwan sa akin siguro yabang,” ani Duterte.
- Latest
