DMW, OWWA, magpapadala ng augmentation team sa Israel

MANILA, Philippines — Magpapadala ang Department of Migrant Workers (DMW) at Overseas Workers Welfare Administration (OWWA) ng augmentation team para tumulong sa pagsagip at pagpapauwi sa mga Pilipinong naapektuhan ng digmaang Israel-Hamas, partikular ang mga nasa southern Israel malapit sa hangganan ng Gaza.

Sa isang news forum, sinabi ni DMW Officer-in-Charge  Hans Cacdac na ang mga Pilipino na malapit sa hangganan ng Gaza ay dinala na sa mas ligtas na lugar at ang Philippine Labor Attaché at Welfare Officer ay nakikipag-ugnayan na sa kanila.

Sinabi rin ni Cacdac na ang hangganan ng Israel sa Gaza ay idineklara na No Entry Zone ng Israeli Defense Forces.

Ayon sa DMW, ang mga pamilya ng nasa 770 Pilipino ay nakipag-ugnayan sa mga helpline ng gobyerno upang mahanap ang kanilang mga kamag-anak. Nasa 768 na ang natukoy ng mga migrant welfare officials at dalawa na lamang ang hindi pa natutukoy.

Mayroon ding 124 OFWs sa Lebanon na humihingi ng repatriation, at ang gobyerno ay nagtatrabaho na upang maiuwi ang unang batch mula sa nasabing bansa.

Magkakaroon ng ika-apat na batch na Filipino na babalik sa bansa sa ilalim ng mga pagsisikap sa emergency repatriation ng DMW at OWWA sa pakikipagtulungan sa DFA at Philippine Embassy sa Tel Aviv.

Kasama sa mga uuwi ang nasa 32 hotel workers, 28 caregivers at apat na sanggol.