P4.56 bilyong intel, confidential funds hirit ng OP

MANILA, Philippines — Aabot sa P4.56 bilyon intelligence at confidential funds ang inihihirit ng Office of the President sa pambansang budget para sa susunod na taon.

Ang nasabing halaga ay mas mataas ng P120 milyon kumpara sa kasalukuyang budget.

Sinabi ni Budget Secretary Amenah Pangandaman, may dagdag na confidential funds para sa Department of Information and Communications Technology (DICT) Anti-Money Laundering Council (AMLC) at Presidential Security Group (PSG).

Nasa P300 milyong pondo ang inilaan sa DICT para sa cyber programs habang dinagdagan ng P50 milyon ang PSG para sa intelligence activities tuwing may biyahe sa labas ng bansa si Pangulong Marcos.

Paliwanag pa ni Pangandaman na kung titingnan ang trend, bumababa ang pag-increase sa confidential at intelligence funds ng gobyerno kumpara noong mga nakarang taon.

Bukod sa confidential at intel funds, humihirit din si Pangulong Ferdinand Marcos Jr. sa Kongreso ng P1.408 bilyong budget para sa kanyang local at foreign trips para sa taong 2024. Mataas ito ng 58% sa P893.87 milyong pondo para sa taong 2023.