Padilla nagbitiw bilang EVP ng PDP-Laban

MANILA, Philippines — Nagbitiw na bilang Executive Vice President ng Partido Demokratiko Pilipino Lakas ng Bayan (PDP-Laban) si Senator Robin Padilla.

Ang irrevocable resignation ni Padilla ay isinumite noong May 29 subalit nilinaw na siya ay mananatiling miyembro ng naturang partido.

Sinabi ng Senador na ang kanyang resignation ay para sa kapakinabangan at kabutihan ng PDP-Laban at mga ­miyembro nito.

Paliwanag pa ni Padilla na malaki at maigting ang responsibilidad na kadikit ng tungkulin ng Ikalawang Pangulo habang mabigat din ang mandato niya bilang senador ng bansa.

Mas nararapat umano ang isang EVP na makapaglalaan ng buong oras para gampanan ang responsibilidad nito sa partido.