Patay sa 'LPA floods' umabot sa 33 sa buong bansa; 1.6-M katao nasalanta

MANILA, Philippines — Umabot na sa 1.67 milyong katao ang naapektuhan ng umiiral na low pressure areas, shear line at Hanging Amihan sa buong Pilipinas simula ika-2 ng Enero — bagay na pumatay na sa 33 katao.

Ayon sa huling taya ng Office of Civil Defense, Huwebes, umabot na sa 412,339 pamilya ang nasalanta ng mga naturang weather systems. Kabilang dito ang mga sumusunod:

• patay (33)
• sugatan (12)
• nawawala (7)
• lumikas (266,349)

Miyerkules lang nang sabihin ng PAGASA na magdadala ng katamtaman hanggang malalakas na pag-ulan ang shear line sa Camarines Norte, Camarines Sur, Catanduanes at Albay ngayong araw.

Samantala, mahihina hanggang katamtaman na may minsanang malalakas na pag-ulan ang Quezon, Marinduque, Oriental Mindoro, Romblon, Northern Samar at nalalabing bahagi ng Bikol. 

Agri damages umabot ng P414.34-M halaga

Pumalo naman na sa P414.34 milyong halaga ng pinsala ang naitatamo ng masungit na panahon sa sektor ng agrikultura.

Umabot naman na sa P206.95 milyong halaga ang damages sa infrastructure. Bukod pa riyan, sumampa na sa 1,672 kabahayn ang napinsala. 

Inilagay na sa state of calamity ang dalawang probinsya at 14 lungsod/munisipalidad, dahilan para magpatupad doon ng automatic prize freeze sa mga basic necessities.

Nakapagbigay na tuloy ng nasa P86.82 milyon na ang naibibigay na ayuda sa mga apektadong populasyon.

Nagpapatuloy pa naman hanggang sa ngayon ang pagtatalaga ng search and rescue teams hanggang sa ngayon.