'Never mangyayari': Marcos ayaw kumasa sa one-on-one debate vs Robredo
MANILA, Philippines — Hindi tinanggap na kampo ni presidential candidate Ferdinand "Bongbong" Marcos Jr. ang hamong one-on-one na debate ng katunggaling si Bise Presidente Leni Robredo — ito habang idinidiin nilang hindi ito mangyayari.
Biyernes lang kasi nang sabihin ni VP Leni na hindi siya tutuloy sa Comelec-KBP panel interview. Sa halip, inanyayahan niya ang karibal na si BBM — na hindi nagpupunta sa presidential debates maliban sa inihanda ng SMNI — sa isang debate.
"Sa debate na hamon kay presidential frontrunner Bongbong Marcos ay hindi ito kailanman mangyayari sa ilang kadahilanan. At batid ni Ginang Robredo ang mga kadahilanang ‘yan," wika ni Vic Rodriguez, tagapagsalita ni Bongbong, kanina.
"Positibong pangangampanya at walang paninira ang gabay ng UniTeam ni Bongbong Marcos. At derecho sa taumbayan ang mga mensahe nito at ang panawagan ng pagkakisa. Pawang mga negatibo, panlilinlang at paninira naman ang sa kampo ng dilawan."
Sinasabi ito ng kampo ni Marcos kahit na pagkakataon sana ang mga debate para mailatag at mapag-usapan kung gaano kawasto ang kanilang mga plataporma. Lugar din ito upang masagot ang mga isyung kinakaharap ng mga kandidato.
Kilalang nahaharap sa isyu ng P203.8 bilyong estate tax ang pamilya Marcos, bagay na sinisingil pa hanggang ngayon ng Bureau of Internal Revenue. Bukod pa ito sa isyu ng diktadura ng kanyang amang si Ferdinand Marcos Jr. at kanilang nakaw na yaman, na kinikilala ng korte.
Dagdag pa ni Rodriguez, "malaking ginhawa" raw sa publiko ang makitang "kalmado lang" na nagkakampanya at hindi nag-aaway o nagsisiraan ang mga taong naghahangad na mamuno sa bansa.
Ibinabandera ng kampo nina Bongbong ang diumano'y "positibong pangangampanya," kahit na kasama ang kapatid niyang si Sen. Imee Marcos sa paggawa ng mapanuyang "Len-Len" videos kasama ang kontrobersyal na direktor na si Darryl Yap. Sinasabing si Robredo ang kanilang pinatatamaan doon.
Bakit gusto makipagdebate ni Leni, Ka Leody?
Kanina lang nang sabihin ni VP Leni na iisang kandidato na lang sa pagkapresidente ang hindi pa humaharap sa taumbayan sa isang debate kasama ang lahat ng kandidato. Mahalaga raw sana ito upang masuri ng mga botante ang kumakandidato, at para mapagkumpara ang mga tumatakbo pagdating sa kanilang "vision at pagkatao."
"We owe it to the people and to our country," wika niya kanina.
"Kung papayag po kayo, anytime, anywhere, darating ako."
JUST IN: Vice President Leni Robredo will not attend the Comelec-KBP forum as she wants to be with volunteers supporting her candidacy. Instead, she is inviting her archrival, former Sen. Bongbong Marcos, to a debate @PhilstarNews pic.twitter.com/WWXminIXLE
— Xave Gregorio (@XaveGregorio) April 29, 2022
Sang-ayon naman si Ka Leody de Guzman, na kumakandidato rin sa pagkapresidente, sa swestyon ni Robredo na magharap-harap pa rin sa debate.
"Pero mas makabuluhan kung isasama tayo sa debate upang masiguradong hindi maisasantabi ang mga batayang isyu ng masa at mga konkretong solusyon para dito," sabi ng lider-manggagawa.
"'Yun ang exciting part para sa simpleng tao."
Maganda ang hamon ni Leni kay Bongbong na magharap sa isang debate. Pero mas makabuluhan kung isasama tayo sa debate upang masiguradong hindi maisasantabi ang mga batayang isyu ng masa at mga konkretong solusyon para dito. Yun ang exciting part para sa simpleng tao.
— Ka Leody de Guzman (@LeodyManggagawa) April 29, 2022
Matatandaang kinansela ng Comelec ang dapat sana ay huling pre-election debates at ginawa na lang itong panel interviews sa dahilang nagkaroon ng problema sa schedules at pagbabayad sa venue.
- Latest
