Ex-Comelec commissioner, bagong SC justice

MANILA, Philippines — Itinalaga ni Pangulong Rodrigo Duterte si dating Comelec Commissioner Antonio Kho Jr. bilang bagong Supreme Court associate justice.

Kinumpirma ni SC spokesperson Brian Hosaka na nakarating na sa tanggapan ni Chief Justice Alexander Gesmundo ang ‘appointment papers’ ni Kho.

Papalitan ni Kho ang nabakanteng puwesto ng nagretirong si Associate Justice Rosmari Carandang nitong Enero.

Nabatid na si Duterte rin ang nagtalaga kay Kho sa Comelec noong Hulyo 2018. Nagretiro siya sa komisyon nitong Pebrero 2.

Kabilang si Kho sa ­Second Division ng Comelec na nagbasura sa petisyon para kanselahin ang Certificate of Candidacy (COC) ni presidential candidate Ferdinand ‘Bongbong’ Marcos Jr.

Nakaapela ang ­naturang desisyon sa Comelec at inaasahan na aabot ito sa SC na miyembro na si Kho.

Nakatakdang maghirang din si Duterte ng isa pang opisyal ng SC dahil sa nalalapit na pagreretiro sa Mayo ni Senior ­Associate Justice Estela Perlas-Bernabe. Kapag nangyari ito, aabot na sa 13 ang magiging appointee ni Duterte sa SC.