Mayorya ng mag-aaral ‘di gaanong natuto sa online learning – survey

MANILA, Philippines — Majority ng mga kabataang mag-aaral ang nagsasabing hindi sila gaanong natututo sa online learning na ipinatutupad ng pamahalaan sa panahon ng pandemic.

Sa online survey ng Movement for Safe, Equi­­t­able, Quality and Relevant Education (SEQuRE) na ginawa noong June 25 hanggang July 2, nasa 86.7 percent ng mag-aaral gamit ang modular lear­ning, 66% gamit ang online at 74% blended learning ang nagsabing kakaunti ang kanilang natututunan sa ilalim ng alternative modes of instruction kumpara sa tradisyunal na face-to-face learning bago magpandemic.

Lumabas din na 5.4% lang ng mga mag-aaral sa ilalim ng blended, 5.7% sa modular at 9.1% sa online ang nagsabing sila ay natuto.

Mayroon namang 24.8% sa online, 20.7% sa blended at 7.6% sa modular ang naniniwalang sila ay higit na natuto kaysa bago mag-pandemic.

Nasa 72.7 percent naman ng online learners ang dumanas ng hindi nakapasok sa klase dahil sa problema sa kanilang devices o internet habang 73.3% ng modular lear­ners ang hindi nakapag-submit ng kanilang mo­dules sa takdang oras.

Ayon sa 50% ng mga guro, 4 hanggang 6 sa bawat 10 mag-aaral ay nahuhuli sa ibang mag-aaral.

Nasa 40% ang nagsabing ayaw na nila sa distance learning sa susunod na pasukan habang 21% ang nagsabing kahit ano at 39% ang undecided.

Kabilang sa mga res­pondents ang 1,278  guro, 1,299 Grades 4-12 students at 3,172 mga magulang na karamihan ay mula sa National Capital Region.