AFP, PNP aarangkada na sa mga subdivision sa Cavite

CAVITE , Philippines  — Aarangkada na ang puwersa ng mga sundalo at pulis partikular sa mga subdivision ng buong lalawigan ng Cavite upang mag-takeover sa pagpapatupad ng Enhance Community Quarantine na tatawagin na ngayong Vitamin Enriched ECQ.

Sa Facebook page ni Cavite Gov. Jonvic Remulla, nagbabala ito na simula ngayong linggo ay paiiralin na ang mas mahigpit na ECQ sa mga subdivision o gated communities.

Hindi na lamang mga barangay officials ang mamahala kundi pangungunahan na ng Philippine National Police (PNP) ang mas istriktong ECQ.

“Ang PNP ay papasok na sa mga subdivision. Warning po sa mga matitigas ang ulo, Senior man o mga kabataan, mga Misis at mahihilig tumambay, pasensiyahan po tayo kapag kayo ay natiyempuhan, huhulihin kayo at dadalhin sa mga kaukulang lugar,” sabi ni Remulla.