DND: Barkong Pinoy nabangga ng mga Tsino sa West Phl Sea, lubog

MANILA, Philippines — Lumubog ang isang sasakyang pandagat na may lulang mga Pilipino matapos diumano banggain ng isang barkong Tsino sa mga katubigan ng West Philippine Sea, pagkukumpirma ng Department of National Defense ngayong Miyerkules.

Nangyari raw ang insidente nitong Linggo sa bandang Recto Bank (Reed Bank) na nasa loob ng Exclusive Economic Zone ng Pilipinas.

Ang insidente, iniulat daw ng ilang Pilipinong mangingisda malapit sa pinangyarihan.

A Filipino fishing boat sank after was it was rammed by a Chinese fishing vessel in the vicinity of Recto Bank in the the West Philippine Sea Sunday evening, the Department of National Defense (DND) reported. | via Jaime Laude pic.twitter.com/ERfOaRGjH5

— The Philippine Star (@PhilippineStar) June 12, 2019

"A collision between a Chinese and Filipino vessel (F/B GIMVER 1) was reported by Filipino fishermen near the Recto Bank in the West Philippine on the evening of June 9, 2019. The collision sank the Filipino vessel," ani Defense Secretary Delfin Lorenzana sa isang pahayag.

(Isang banggaan sa pagitan ng isang Chinese at Filipino vessel (FB Gimver1) ang naiulat ng mga mangingisda malapit sa Recto Bank sa West Philippine Sea gabi ng ika-9 ng Hunyo. Napalubog ng banggaan ang sasakyan ng mga Pilipino.)

Nagsalpukan daw ang dalawa habang nakaangkla't hindi umaandar ang F/B GIMVER 1.

Kilala ang Recto Bank na hitik sa likas yaman gaya ng oil at gas deposits, na pinag-iinteresan din ng Tsina.

'Hindi gawain ng mga tao na responsable at palakaibigan'

Labis namang ikinadismaya ni Lorenzana ang aksyon ng mga Tsino lalo na't iniwan na lang daw ng mga dayuhan ang mga Pilipino matapos madisgrasya.

"We denounce the actions of the Chinese fishing vessel for immediately leaving the incident scene abandoning the 22 Filipino crewmen to the mercy of the elements," dagdag ng kalihim.

(Kinukundena namin ang aksyon ng mga mangingisdang Tsino dahil basta na lang nilang iniwan sa eksena ang 22 Pilipino sa panganib ng kalikasan.)

"This is not the expected action from a responsible and friendly people."

(Hindi ito ang inaasahan naming aksyon mula sa mga responsable at palakaibigang mga tao.)

Nagpasalamat naman ang DND sa mga Vietnamese na nasa lugar na siyang sumaklolo sa 22 Pilipino at ibinalik sila sa Western Command ng Armed Forces of the Philippines.

Nangako ang pamahalaan na magsasagawa ng pormal na imbestigasyon sa nangyari.