P72M penalty sa Xiamen

MANILA, Philippines — Umabot na sa P72 milyon ang penalty na babayaran ng Xiamen Airlines sa gobyerno dahil sa nilikha nitong problema ng sumadsad ang kanilang eroplano noong Agosto 16 sa Ninoy Aquino International Airport (NAIA).

Ito ang sinabi ni Manila International Airport Authority (MIAA) General Manager Ed Monreal sa pagpapatuloy ng pagdinig ng Senate committee on public services ni Sen. Grace Poe.

“Umaabot na po sa almost P72 million. Meron na kaming pinag-uusapan na karagdagang P42 million plus,” sabi ni Monreal.

Ayon kay Monreal, nakausap na nila noong Biyernes ang finance officer ng Xiamen airline at siniguro naman ng mga ito na babayaran nila ang kanilang penalty.

Magugunita na libu-libong pasahero ang naapek­tuhan ng Xiamen aircraft sa NAIA na naging dahilan upang makansela ang kanilang mga flights.