Bayad sa LTFRB sa bangko na

CEBU, Philippines - Nagpirmahay og Memorandum of Understanding ang Land Transportation Franchising and Regulatory Board ug Landbank.

Kini aron ang tanang bayad sa transaksiyon sa LTFRB adto na ibayad sa maong bangko.

"It's a measure aimed at boosting our anti-fixer drive. Clients can pay for LTFRB transactions at Landbank and it will be honored by us,” matud ni LTFRB-7 Director Ahmed Cuizon.

Gilusad sa niaging adlaw ang Landbank Inclusive Banking Center kauban sa LTFRB isip pioneer agency nga makabenepisyo sa maong programa.

"Through LIBC, we hope to provide more seamless and more convenient transactions for the clients of LTFRB and other government offices in the future,” matud ni Alex Buenaventura, ang president ug CEO sa Landbank.

Ang LIBC sa LTFRB motabang kini sa pag-streamline sa proseso sa pagbayad alang sa kasayon sa mga kliyente.

"Part of the agreement is the establishment of a safe, efficient and reliable electronic retail payment system that aims to replace existing cash transactions susceptible to graft and corruption,” dugang ni Buenaventura sa iyang pamahayag. (Mitchelle L. Palaubsanon/GMR)

Canteen sa CPDRC di masirad-an

Gibutyag ni Bobby Legaspi, officer-in-charge sa Cebu Provincial Detention and Rehabilitation Center, nga wala pa nila hingpit nasirad-an ang canteen sulod sa provincial jail.

Kini gumikan sa pipila ka piniriso nga nagsalig sa maong canteen alang sa ilang dugang pagkaon.

“Actually ang canteen nag-offer sad sila og sud-an nga baligya, so ang initiative sa usa ka inmate kun kulang siya (pagkaon) adto na siya mopalit,” matud ni Legaspi. Matag piniriso tugtan nga adunay kwarta nga P200 gikan sa dalaw matag semana alang sa pagpalit sa ilang pagkaon o laing panginahanglan gikan sa maong tindahan. Matud ni Legaspi nga dili nila basta-basta masirado ang maong tindahan ilabi na nga adunay ubang moutang og mga de lata ug noodles.

“Before we close the canteen we make sure there’s sufficient supply sa food for them. If we cut off right now… you know right now they are using the extra food that is coming in from the canteen,” matud ni Legaspi.

Si Danilo Rodas, ang provincial budget officer, nagkanayon nga karong tuiga moabot sa P65 milyones ang pundo alang sa pagkaon sa mokabat na sa 3,000 ka piniriso karong tuiga.

Sa laing bahin, gi-monitor karon sa Provincial Health Office ang panglawas sa mga piniriso sa CPDRC nunot sa kainit sa panahon.

Matud ni Dr. Mario Joyag, ang doktor sa CPDRC, nga kasagarang sakit sa mga piniriso mao ang respiratory tract infection, ubo, hubak, hypertension ug skin diseases.  Gani matud niya nga halos matag adlaw nag-nebulize sila sa mga piniriso nga adunay hubak.

Hinoon matud niya nga makahatag ra sila og pang-maintenance nga tambal sa ubang piniriso nga adunay hubak ilabina sa walay dalaw.

Si Joyag nagkanayon nga nagpatabang usab sila sa Department of Health (DOH) alang sa pipila ka tambal sa sakit sa panit sama sa ointment alang sa mga piniriso.

Niadtong Lunes, si Joyag nagpakuha og sample sa tubig sa CPDRC sa pagsuta kung kontaminado ba kini subay sa ilang health monitoring sa sulod sa prisohan.

Siya nagkanayon nga ang mas maayo nga adunay saktong hygiene ang mga piniriso aron malikayan ang sakit ilabina nga naghuot ang prisohan.

Ang CPDRC nagpalit og dugang usa ka dosena nga dagkong drums alang sa mga piniriso nga pundohan sa tubig sanglit dili tibuok adlaw nga adunay agas sa gripo.

Sa pagkakaron adunay 2,964 ka piniriso sa CPDRC. (BANAT NEWS)