Naghikog napalgan sa 10-anyos nga anak
CEBU, Philippines - Patay na nga nadangat sa Lapu-Lapu City Hospital ang tricycle driver nga naghikog pinaagi sa paghigot og pisi nga nylon sa liog nga nadiskubrehan sa sulod sa lawak sa ilang panimalay sa Bangbang, Lungsod sa Cordova niadtong Sabado sa hapon.
Si Police Officer 3 Retchie Gapo sa Cordova Police Station niila sa namatay nga si George Olpos, 48-anyos, kinsa giluwas unta sa 10-anyos nga anak lalaki nga maoy unang nakadiskubre.
Matud ni Gapo nga wala diha sa ilang panimalay ang asawa sa namatay gawas lang sa 10-anyos nga bata.
Dali nga nangayo og panabang ang bata ngadto sa iyang uyoan nga nagpuyo usab sa maong lugar kinsa dali nga niputol sa pisi nga gibitik sa liog.
Sa pagkaputol sa pisi wala nabantayi nga natagak kini ngadto sa sementado nga sawog hinungdan sa pagkapantok sa ulo niini.
Gihatud sa tambalanan apan ang mga doktor nideklarar na nga dead on arrival.
Si Gapo niingon nga ang mga sakop sa pamilya sa namatay wala gyud nasayud sa gihambin nga suliran sa namatay nga maoy nagtukmod sa paghikog. (BANAT NEWS)
- Latest
