Bongbong ok sa ‘DNA’ kay Grace
MANILA, Philippines – Nakahanda si Sen. Bongbong Marcos na sumailalim sa DNA testing sa gitna ng ginagawang paghahanap ni Sen. Grace Poe sa mga posible nitong kamag-anak.
Ayon kay Marcos, walang problema sa kanya na magbigay ng sample ng kanyang DNA kung ito ay makakatulong kay Poe.
“Sure pa DNA ako walang problema…I don’t see how will that help her (Poe) but if that will, why not?,” ani Marcos.
Matagal ng kumakalat ang isang urban legend na anak umano si Poe ni dating Pangulong Ferdinand Marcos sa dating actress na si Rosemarie Sonora na inampon ng namayapang action king Fernando Poe Jr. at asawang si Susan Roces.
Sinabi pa ni Marcos na kung mapapatunayang half sister nga niya si Poe ay iwi-welcome niya ito sa kanilang pamilya.
Matatandaan na puro negatibo ang naging resulta ng DNA testing sa sample na ibinigay ni Poe at ng mga hinihinalang mga kamag-anak niya.
Makakalaban ni Marcos sa pagka-bise presidente ng bansa ang running mate ni Poe na si Sen. Chiz Escudero.
Nang tanungin si Marcos kung papipiliin ba niya si Poe sa pagitan nila ni Escudero sakaling mapatunayan na magkapatid sila sa ama, sinabi ng senador na ipauubaya na lamang niya ito kay Poe.
- Latest
