Bagong DILG chief hinirang ni PNoy
MANILA, Philippines – Inanunsyo kahapon ni Pangulong Aquino na si Western Samar Rep. Mel Senen Sarmiento ang papalit kay DILG Sec. Mar Roxas sa sandaling magbitiw ito sa puwesto at magsumite ng kanyang certificate of candidacy bilang presidential candidate.
Inalok ng Pangulo si Rep. Sarmiento, secretary-general ng Liberal Party (LP) bilang susunod na DILG chief na tinanggap naman umano ng kongresista.
“Congressman Mel Sarmiento is the next DILG secretary, subject to confirmation,” wika ng Pangulo sa isang media forum.
Si Sarmiento ay naging Alkalde ng 9 na taon bago ito naging kinatawan ng Samar noong 2010.
Malaki rin ang karanasan at malalim ang kaalaman ni Sarmiento sa local government na kailangan para sa Secretary ng DILG.
Magugunita na nagsumite si Roxas ng kanyang resignation bilang DILG chief kay Pangulong Aquino noong Agosto 3 subalit hindi ito tinanggap ni PNoy bagkus ay humingi pa ito ng kaunting panahon upang tapusin nito ang mga programa sa DILG.
Ginawa ni Roxas ang pagbibitiw sa puwesto 3 araw matapos siyang iendorso ni PNoy bilang pambato ng administrasyon sa darating na 2016 presidential elections.
Samantala, hindi pa rin sumusuko si PNoy sa panliligaw kay Sen. Grace Poe upang maging runningmate ni Roxas.
“Until the end of filing period, we will not give up on Grace,” paniniguro pa ni Aquino.
Nilinaw din ni PNoy na hindi na kailangang magdaos ng party caucus ang LP upang makapili ng magiging runningmate ni Roxas sa darating na eleksyon.
- Latest
