Abi Binay sa Blue Ribbon Committee: Imbitahin niyo ko

MANILA, Philippines – Hinamon ni Makati City Rep. Abigail Binay ngayong Miyerkules ang Senate Blue Ribbon subcommittee na imbitahan siya sa mga pagdinig tungkol sa umano’y pangungurakot ng kanilang pamilya.

Sinabi ni Binay na nais niyang maipagtanggol ang kanilang pamilya laban sa mga paratang na ibinabato sa kanila.

"Imbitahin n'yo ko para rin naman makasagot kami at mapaglaban naman namin yung mga kasinungalingan na sinasabi niyo sa amin. Name the day, I'll be there," pahayag ng kongresista na inakusahan na may mga iregularidad sa kaniyang  Priority Development Assistance Fund.

Hinamon din ni Binay si Sen. Antonio Trillanes IV na isiwalat ang umano’y 15 tseke na binigay niya kay dating Makati Social Welfare Development Department head Ryan Barcelo.

"It is the city treasurer that is issuing the check to Ryan Barcelo. Kaya nga ang sabi ko sa kanila, ilabas n'yo 'yung tseke na sinasabi n'yo, tingnan natin kung ako 'yung signatory ng tseke na 'yan," wika ni Binay.

Iginiit niya na hind siya ang pumipirma sa mga naturang tseke.

Samantala pinuna rin ni Binay ang milyung-milyong ginastos umano ni Trillanes para sa kaniyang mga consultants.

"Kung sana man lang ginagamit po ni Senator Trillanes 'yung 55 consultant niya eh tama 'yung intelligence na nakukuha niya... 'Yun naman ho ang problema kasi lagi siyang naglalabas ng isyu o pasabog niya na hilaw. Kaya he is the boy who cried wolf. At the end wala namang maniniwala sa kanya," banggit ng kongresista ng Makati.