‘Hanna’ pumasok na sa PAR

MANILA, Philippines – Pumasok na sa Philippine Area of Responsibility (PAR) ang bagyong Hanna na may international name na Soudelor.

Tinaguriang pinaka malakas na bagyo si Hanna sa buong mundo dahil sa taglay nitong mahigit 300 kilometro bawat oras na lakas ng hangin pero nang pumasok sa PAR ay bahagyang humina ito.

Napanatili ni Hanna ang lakas ng hangin na umaabot sa 215 kilometro kada oras at pagbugso na umaabot sa 250 kph.

Kumikilos ito pa-kanluran-hilagang kanluran sa bilis na 20 kilometro bawat oras.

Sa pagpasok ng bagyo sa Pilipinas, nagsimula na nitong hatakin ang habagat kayat inaasahan ang malawakang pag-uulan sa Mindanao at sa mga susunod na araw ay asahan ang epekto nito sa Visayas at Luzon partikular sa Metro Manila.

Didiretso si Hanna sa Taiwan, China at bahagi ng Japan.