2 Salisi Gang, arestado
MANILA, Philippines – Dalawang miyembro ng notoryus na Salisi Gang ang nasakote ng mga operatiba ng pulisya matapos biktimahin ang isang tindero ng bigas sa Antipolo City, Rizal kahapon ng umaga.
Kinilala ni P/Chief Supt. Bernabe Balba, director ng Rizal Provincial PNP ang dalawang suspek na sina Jayson Calaminos, 19, ng Alaminos Street, Barangay Santolan sa Pasig City; at Warren Morillo, 23, ng Barangay Dela Paz, Pasig City.
Ang pagdakip sa dalawa ay bunsod ng reklamo ng biktimang si Ferdinand Barientos, 32, tindero ng bigas sa Antipolo Public Market.
Sa reklamo ni Barientos, sinabi nito na dakong alas-6:45 ng umaga ay lumapit sa kanya si Calaminos at nagsabing bibili ng 20-kilong bigas sabay abot ng P1,000 bayad.
Habang nagtatakal na ang biktima ay biglang nagbago ang isip ng Calaminos at sinabing brown rice na lamang ang bibilhin pero walang ganung paninda ang biktima kaya binawi ng suspek ang kanyang pera at iniabot sa kanyang kasama na si Morillo.
Pinalitan naman ni Morillo ng P100 ang isinoling P1,000 kaya nagkaroon ng pagtatago at iginiit ng biktima na isang libo ang kanyang ibinalik.
Habang aktong nagtatalo ay dumating ang kamag-anak ng biktima at sinabing modus ng dalawa ang ganung pangloloko kaya ipinaaresto.
- Latest
