60 Pinoy sa HK nahatulan sa pagdadala ng ‘stun gun’

MANILA, Philippines – May 60 Pinoy ang nahatulan ng korte sa Hong Kong dahil sa pagdadala ng stun gun at mga kahalintulad na gamit.

Ayon sa Office of the Vice President, nagpalabas ng babala ang Philippine Consulate sa Hong Kong matapos ma-convict ang 60 kababayang Pinoy na karamihan ay mga tripulante dahil sa pagdadala ng mga “armas” na walang lisensya nitong 2014.

Dahil dito, nanawagan kahapon si Vice Pres. Jejomar Binay, tumatayo ring Presidential Adviser on OFWs Concern sa mga Pinoy na iwasang magdala sa kanilang bagahe ng mga stun guns at kahalintulad na gamit papasok sa Hong Kong.

Ayon kay Binay, itinuturing na “armas” sa ilalim ng HK Fireams and Ammunition Ordinance ang mga stun guns, tear gas, bullets o bala, extendible batons, flick knives at knuckle dusters at mahigpit na ipinagbabawal ang pagdadala nito sa nasabing Chinese territory.

Ang mga mapapatunayang nagkasala sa pagdadala ng mga nabanggit na device ay may katapat na parusang pagkakakulong ng hanggang 14 taon at may multa na HK$100,000.