FDA nagbabala sa herbal food supplement na hindi rehistrado
MANILA, Philippines - Binalaan ng Food and Drug Administration (FDA) ang publiko laban sa mga unregistered herbal food supplement na ibinebenta online bilang food supplement.
Ayon kay FDA acting director Dr. Kenneth Hartigan-Go, panibagong advisory ang kanilang inilabas laban sa Sehat Badan, isang herbal powdered at food supplement na gawa ng PJ Nylor Koneng sa Indonesia, na patuloy na ibinebenta sa Mindanao sa kabila ng pagbabawal dito dahil hindi ligtas na inumin.
Nabatid na nagtataglay ng droga at positibo sa diclofenac sodium, ibuprofen at paracetamol ang nasabing food supplement na nabibili lamang sa mga grocery stores, malls at street vendors.
Nakasaad sa FDA advisory 2014-006 noong January 15, 2014 na hindi na maaaring ibenta ang Sehat Badan dahil na rin sa mga paglabag nito kabilang ang kawalan ng English translation sa label.
Ibinebenta rin ang Sehat Badan sa merkado bilang herbal drink at nakapagpapagaling umano ng asthma, urinary stones, allergy, impotence, rheumatism, toothache at ulcer. Subalit ang mga ito ay hindi aprubado ng FDA.
- Latest
