38 na patay kay 'Glenda'

MANILA, Philippines — Umabot na sa 38 katao ang nasawi sa hagupit ng bagyong “Glenda,” ayon sa state disaster response agency ngayong Huwebes.

Sinabi ni National Disaster Risk Reduction and Management Council (NDRRMC) executive director Alexander Pama na 22 sa mga nasawi ay mula sa Calamba, Laguna, Batangas, Rizal, at Quezon (CALABARZON).

Lima naman ang nasawi mula sa Mimarop, apat sa Bicol region, tatlo sa Central Luzon at tig-dalawa sa Metro Manila at Eastern Visayas.

"We will try to find out what exactly is the reason why some of our countrymen still refuse to heed these (typhoon) warnings," wika ni Pama.

Samantala, walong katao pa ang pinaghahahanap ng NDRRMC matapos manalasa ang pampitong bagyo ngayong 2014 kahapon.

Hindi bababa sa 192,000 pamilya o higit isang milyong katao ang naapektuhan ni Glenda, kung saan umabot sa P45 milyon at P68 milyon ang halaga ng pinasala sa impastraktura at agrikultura.