Yolanda survivors sa Iloilo walang natanggap na tulong
MANILA, Philippines - Wala pa ring nakakarating na tulong mula sa gobyerno ang mga survivor ng super typhoon Yolanda sa Iloilo.
Ito ang sinabi ni Jaro Archbishop Angel Lagdameo, dating pangulo ng Catholic Bishops’ Conference of the Philippines (CBCP).
Bukod umano sa tulong na hindi dumarating, wala ring nakikitang rehabilitasyon mula sa gobyerno ang nasabing lalawigan.
“Well, hindi ko nakikita ang tulong ng gobyerno, ang nakikita ko lamang ay yung tulong ng Austria, mga Caritas Social Service,” ani Lagdameo, sa panayam ng church-run Radio Veritas.
Lubos namang nagpapasalamat ang arsobispo sa international aid ng Caritas Austria sa rehabilitation program ng Archdiocese of Jaro para sa mga napinsala ng bagyo.
Iniulat ng Arsobispo sa Radio Veritas na 1,000-bahay ang ipinapatayo ng Caritas Austria sa Concepcion at Banate sa Jaro, Iloilo na titirhan ng 1,000 pamilya na nawalan ng tirahan at kabuhayan sa pananalasa ni Yolanda noong Nobyembre 2013.
Tuloy-tuloy rin at pinalawak pa ng Archdiocese ang kanilang livelihood program sa lahat ng apektado ng Yolanda sa Iloilo.
Nabatid mula sa talaan ng National Disaster Risk Reduction and Management Council (NDRRMC) na 290,777 pamilya o 1.3 milyong tao ang naapektuhan ng super bagyo.
- Latest
