Iregularidad sa administrasyon huwag itago sa PDAF scam

MANILA, Philippines - Pinaalalahanan ng Makabayan bloc sa Kamara ang Malakanyang na hindi dapat gamitin ang pag-aresto sa mga kinasuhan sa pork barrel scam upang mapagtakpan ang mga sariling iregularidad ng administrasyon.

Ayon kay Bayan Muna Reps. Neri Colmenares at Carlos Isagani Zarate at Gabriela Rep. Luzvi­minda Ilagan, na hindi dapat magamit ng administrasyon ang mga kaso na may kaugnayan sa pork barrel scam para itago ang iregularidad at kapabayaan nito.

Kabilang na umano dito ang isang trilyong pork barrel o lump sum na pondong nasa diskresyon ni Pangulong Aquino, kasama na ang Malampaya fund, special purpose fund, President’s social fund, road users fund at intelligence fund.

Bukod pa dito ang kontrobersyal na Disbursement Acceleration Program (DAP) na sinasabing  ipinanuhol ng palasyo sa mga senador at kongresista kapalit ng impeachment ni dating Chief Justice Renato Corona.

Giit pa ng mga mam­babatas, hindi rin dapat kalimutan ng publiko na hanggang ngayon ay na­nanatiling ‘untouchable’ ang mga kaalyado ng Pangulo na idinawit direkta ni Janet Lim Napoles na sina Budget Secretary Butch Abad at Agriculture Secretary Proseso Alcala.

Hindi rin umano dapat kaligtaan ang kapaba­yaan ng administrasyon sa paghihirap ng publiko dahil sa kaliwat kanan na pagtataas ng presyo ng bilihin sa kabila ng pagkakaaligaga ng lahat at ng gobyerno sa pork barrel scam cases.