Apela kay PNoy P2.6 T budget protektahan vs katiwalian

MANILA, Philippines - Hinimok ngayon ng isang grupo ng mga mamamayan si Pangulong Aquino na sertipikahan bilang “urgent” ang Freedom of Information Act at Budget Impoundment Control Act upang maprotektahan laban sa katiwalian ang panukalang 2.6 trillion peso national budget.

Sa isang media forum, hinikayat ni Prof. Ben Diokno, chairman ng Kilos Kaayusan, si Aquino na ipakita ang kahandaang hugutin ang katiwalian mula sa ibaba hanggang sa itaas ng burukrasya. Mayroon na lamang dalawang taong nalalabi sa kanyang termino si Aquino at ito ang pinakamagandang panahon para sa Pangulo upang iwanang pamana niya sa sambayanang Pilipino ang pagpasa ng dalawang panukalang batas na ito.

Naniniwala ang Kilos Kaayusan na mahalagang maipasa ang FOI at Budget Impoundment Control Act sapagkat solusyon ito sa problema ng maling paggamit ng mga pampublikong pondo. Inililihim ng mga tiwali sa pamahalaan ang pagproseso ng mga dokumentong nagiging daan upang mapunta sa ibang paraan ang buwis ng mga mamamayan.

Kung mayroong FOI, paniwala ng Kilos Kaayusan, maiiwasan na ang patagong pag-aallocate ng mga pondo sapagkat matutuklasan din ito ng mga mamamayan. Dinedebate pa rin sa Kongreso ang FOI samantalang inuupuan naman sa Senado ang Senate bill no. 3121 na ginawa pa mismo ni Aquino noong siya’s isa pang Senador noong 14th Congress.

“Kailangang ipakita ng administrasyong Aquino ang kanyang sinseridad, policy consistency at pagiging objective sa labang ito sa katiwalian sa pamamagitan ng paghimok sa Kongreso na ituring bilang “urgent” ang dalawang kritikal na batas na ito: ang FOI at Budget Impoundment Control Act. Ang una’y naglalayon ng pagi­ging bukas ng pamahalaan sa pagpapakita ng kanyang mga transaksyong ginagawa samantalang epektibong batas naman upang limitahan ang kapangyarihan ng Pangulo sa pakikialam sa kapangyarihan ng Kongreso sa pamamahala ng pondo.

“Hindi dapat mahirap sa Pangulo na maipasa ang mga panukalang ito. Noong senador pa siya, siya mismo ang nagsusulong ng mga ito upang protektahan ang mamamayan laban sa abuso, hindi lamang ng Kongreso kundi ng Tanggapan ng Pangulo. Kung hindi maipapasa itong mga panukalang ito, wala tayong garantiyang matitigil ang katiwalian sa pamahalaan,” anang KK.