Estrada walang balak mag-impake

MANILA, Philippines - Wala pang balak si Senator Jinggoy Estrada na mag-impake sa gitna ng posibleng pag-aresto sa kanya matapos na mai-raffle na ang mga kasong plunder at graft laban sa kanya sa Sandiganbayan.

Ayon kay Estrada, wala siyang nakikitang rason para mag-impake na ng kanyang mga gamit.

Giit ng senador, malapit lang naman ang Camp Crame sa kanilang bahay kaya hindi niya kailangang mag-impake maliban na lang aniya kung sa Fort Sto. Domingo sa Sta. Rosa, Laguna sila ikukulong.

At habang wala pang ipinalalabas na warrant of arrest ang Sandiganba­yan ay sasamantalahin niya ang pagkakataon at bibisita sa kanyang mga constituents habang malaya pa.

Mag-iikot umano siya para pasalamatan ang mga bumoto sa kanya noon dahil hanggang ngayon ay hindi siya iniiwan sa kabila ng mga kasong kinakaharap.