Medical marijuana, malabo sa Kamara

MANILA, Philippines - Malabong umusad sa Kamara at maisabatas nga­yon 16th Congress ang panukalang medical marijuana dahil sa posibleng maabuso pa ang paggamit nito.

Ayon kay House Speaker Feliciano Belmonte Jr., hindi na dapat pang pumasa at gawing legal ang paggamit ng marijuana  dahil nakakapagpabago ito ng takbo ng pag iisip ng isang tao.

Paliwanag pa ni Belmonte, hindi sapat ang mahigpit na regulasyon sa ilalim ng House Bill 4477 na inihain ni Isabela Rep. Rodito Albano III bago magamit ng isang pasyente ang medical marijuana.

‘Naka-hang’ ngayon ay wala pang nakukuhang suporta sa Kamara ang panukala ni Albano dahil sa umanoy risk factor ng paggamit nito.

Para naman kay Ifugao Rep. Teddy Baguilat, Deputy Speaker Giorgidi Aggabao at Marikina City Rep. Marcelino Teodoro , mapanganib ang paggamit ng medical marijuana at umanoy mas mabigat kumpara sa medical intention ng panukala.

Nangangamba ang naturang mga mambabatas dahil walang kakayahan ang gobyerno na ipatupad ang mahigpit na regulasyon kapag pinayagan ang paggamit ng medical marijuana.