Abad kumpiyansang tiwala pa rin si PNoy sa kanya

MANILA, Philippines — Pinabulaanan ni Budget Secretary Florencio Abad ang paratang na kasabwat siya sa kontrobersyal na bilyung-bilyong Priority Development Assistance Fund (PDAF) scam.

Nakasaad sa salaysay ng itinuturong utak sa likod ng PDAF scam na si Janet Lim-Napoles na si Abad ang nagturo sa kanya kung pano palalaguin ang pera gamit ang pondo ng bayan.

Naging magkakuntsaba umano ang dalawa habang kinatawan pa lamang si Abad ng Batanes.

"Wala ho akong kinalaman bilang congressman, bilang opisyal, bilang secretary of [Department of Budget and Management] sa anumang scam ni Napoles o kanyang mga pekeng [non-government organizations]," pahayag ni Abad sa isang panayam sa telebisyon.

"I think she's hallucinating. She's been in bad shape for some time. But I really think that she is vigorously trying to get immunity from this and she's been throwing around names that she feels that can put pressure on the government to consider her application as a state witness but there is no way that she can get that," dagdag niya.

Inamin naman ng kalihim na tinangka ni Napoles na makipagpulong sa kanya.

"Although I have heard that a number of times she had tried to arrange to have an appointment but my staff simply said 'no'," wika ni Abad.

Sinabi ni Abad na lahat ng pondong hawak niya ay napunta sa Batanes na isa sa 20 pinakamahirap na probinsiya sa bansa bago siya umupo bilang kongresista.

"They can very well see there all the benefits that the people got because of that."

Aniya, malabong siya rin ang magtuturo kay Napoles kung paano palaguin ang pera dahil wala naman siyang kakayanan para gawin ito.

"You can see how a very poor 'master' or 'mentor' I am," dagdag niya.

Kumpiyansa pa rin si Abad na tiwala pa rin sa kanya si Pangulong Benigno Aquino III sa kabila ng mga pasabog ni Napoles.

"This list is just a list. Unless this list is fortified by evidence, it is really nothing," banggit ni Abad.

"Hindi lahat ng lumalabas sa radyo, sa t.v. ay katotohanan. Kailangan naman, tignan natin kung anong ebidensya ang sumusuporta dito."