Pinay tinamaan ng Mers CoV sa Saudi

MANILA, Philippines - Isa pang Pinay ang inilagay sa isolation area matapos mag-positibo sa nakamamatay na Middle East Respiratory Syndrome (MERS) Corona­virus sa Saudi Arabia.

Ayon sa Saudi Foreign Ministry, ang 38-anyos OFW na nagtatrabaho sa Riyadh bilang pharmacist ay kasalukuyang inoob­serbahan sa intensive care unit ng King Fahad Medical City matapos ma-admit noong Abril 22.

Nakitaan ito ng sintomas ng Mers coronavirus nang maisugod sa na­sabing ospital.

Unang nagsimula sa Saudi ang Mers Cov may dalawang linggo na ang nakalilipas, na mabilis na kumalat sa Gitnang Sila­ngan. May 339 kaso ang kinumpirma sa Saudi at 102 dito ang naging fatal. 

Sa huling ulat, may 10 sa nasabing bilang ang kinumpirmang nasawi ka­bila ang pito sa Jeddah, dalawa sa Riyadh at isa sa Mecca.

Muling pinaalalaha­nan ng Embahada ng Pilipinas ang mga libu-libong Pinoy na sundin ang mga abiso ng lokal na health officials para sa tamang pagsusuot ng face masks at umiwas sa mga matataong lugar at gumamit ng mga sani­tizers at iba pang hygiene products para makaiwas sa sakit.

May dalawang Pinay nurse, isa sa Riyadh noong nakalipas na taon at isa sa Abu Dhabi, UAE kama­kailan lamang ang kapwa nasawi sa Mers Coronavirus.