Graft cases ng MWSS administrator pinareresolba sa Ombudsman

MANILA, Philippines - Umapela kahapon ang grupo ng mga manggagawa ng Metropolitan Waterworks and Sewerage System (MWSS) kay Ombudsman Conchita Carpio-Morales na resolbahin ang labing isang (11) graft cases na isinampa laban kay MWSS administrator Gerardo Esquivel Jr.

Kasabay nito, hiniling ni MWSS Labor Association Napoleon Quinones kay Carpio-Morales na suspindihin si Esquivel at kapwa akusado nito habang isinagawa ang pagdinig ng paglabag sa Commission on Audit rules.

Kabilang sa mga kapwa akusado ni Esquivel ay sina MWSS Regulators Emmanuel Caparas at ang deputy nito si Vince Yambao na umano’y nagsabwatan sa pagkuha ng 47 consultants na binayaran ng P88 milyon.

Sina Esquivel, Caparas at Yambao ay nakatanggap din umano ng P3 milyong allowances na kung saan ay maliwanag na paglabag sa Commission on Audit (COA) rules.

Ang nasabing mga consultants ay ginagamit umano ni Esquivel sa pag-atake laban sa water conscessionaires na Manila Water at Maynilad.

Sa isinagawang panayam kay Quinones, may natanggap siyang mga ulat mula sa loob ng Ombudsman na may tumutulong sa kaso ni Esquivel na malapit kay Pangulong Noynoy Aquino.

Nagpahayag ng pangangamba si Quinones na posi­bleng magkaroon ng ‘white wash’ ang kaso ni Esquivel  na nakahain sa Ombudsman dahil sa pressure ng nasabing graft body.