‘Ma’am Arlene’ nakasibat na

MANILA, Philippines - Nakalabas na ng bansa ang “Ma’am Arlene” na mala-Janet Napoles sa hudikatura.

Ito naman ang nabatid mula kay Bureau of Immigration (BI) Commissioner Siegfred Mison kung saan sinabi nito na nakalabas na ng Pilipinas si Arlene Angeles Lerma, ang umano’y isa sa tatlong “Ma’am Arlene”  na iniimbestigahan ng Korte Suprema.

Batay anya sa record, nitong Oktubre 16, Miyerkules nakaalis ng bansa si Lerma lulan ng Philippine Airlines flight mula sa Ninoy Aquino International Airport (NAIA) Terminal 2 patungo sa isang bansa sa Asya na hindi na tinukoy ng BI.

Nakumpirma rin ng National Bureau of Investigation (NBI) na isa sa kanilang iniimbestigahan ang taong nakaalis ng Pilipinas matapos magtugma sa kanilang record ang petsa ng kapanganakan nito na July 11, 1968 sa dokumentong ginamit ni Lerma sa pagpunta sa abroad.

Depensa naman ng BI sa pag-alis ni Lerma, walang hold departure order (HDO) o kaso laban dito.

Bagama’t sinasabing madalas mag-abroad si ‘Ma’mm Arlene’, wala namang impormasyon kung kailan babalik o kung babalik pa ito. 

Naging maimpluwensya umano si “Ma’am Arlene” sa eleksyon ng Philippine Judges Association (PJA).

Matatandaang umarangkada ang imbestigasyon ng NBI sa mga “Ma’am Arlene” kasunod na rin ng hiling ni Chief Justice Maria Lourdes Sereno.

May hiwalay ding imbestigasyon na ginagawa ang Korte Suprema dito.