Tulong ng UN hingi sa Zambo crisis

MANILA, Philippines - Kailangan na uma­nong manghimasok ang United­ Nations (UN) upang mare­solba ang krisis sa Zamboanga City matapos ang paglusob ng daan-daang miyembro ng Misuari breakaway group na may hawak pang mga residenteng hostages.

Ayon kay Crisis Committee Council (CMC) Chair­man at Zamboanga City Mayor Isabelle “Beng” Climaco-Salazar, hinihiling ng MNLF ang pagpasok sa eksena ng UN upang maresolba ang krisis dahil isa umano itong mabigat na problema.

Ayon kay Climaco, nag­mamatigas umano ang grupo ng MNLF na pinamumunuan ni Nur Misuari at limang commanders nito na nasa likod ng bakbakan sa Zamboanga na maki­pag­negosasyon sa mga lokal na opisyal ng pamahalaan para palayain ang nalalabi pang mga bihag.

Sa pinakahuling update, tinatayang 30-37 pang sibilyan ang hino­stage habang dalawa pang miyembro ng MNLF ang napaslang sa paki­ki­pagbakbakan sa tropa ng pamahalaan kahapon sa Zamboanga City.

Sa biglaang press briefing­, sinabi ni AFP spokesman Brig. Gen. Domingo Tutaan, alas-3:30 ng hapon ng maka­sagupa ang security for­ces ang MNLF breakway group sa Brgy. Ca­­nelar.

Bukod dito ay nagkaroon rin ng putukan sa pa­gitan ng security for­ces sa Brgy. Sta. Barbara kung saan nagsisipagkubli ang MNLF sa nasabing lugar kasama ang nasa 180 pang hostages.

Tinatangka ng MNLF na tumakas sa kordon ng militar ng mangyari ang bakbakan.

Napaulat na pinapu­tukan din ng MNLF rebels­ ang isang C130 plane ng Philippine Air Force ba­gaman hindi naman ito tinamaan.

Samantala, nanindi­gan si AFP Public Affairs Office Chief Lt. Col. Ramon Zagala na hindi aatras ang security forces upang mapanga­lagaan ang seguridad ng mamamayan ng lungsod at ma­ging ang mga pa­ngunahing instalasyon ng gobyerno rito.

Una rito, pinaatras ng mga commander ng MNLF na may hawak na mga bihag sa mga apek­tadong lugar ang tropang gobyerno at nakaposis­yong mga tangke ng mga ito dahil gutom at nauuhaw na umano ang kanilang mga hostage.

Nilinaw rin ni Zagala na walang idinedeklarang ceasefire ang security for­ces taliwas sa mga espekulasyon.

Nanawagan rin si Salazar sa mga groceries at iba pang tindahan ng pagkain sa palengke na magbukas para makabili ng supply ng mga pagkain ang mga nagugutom na residente.

Suspendido pa rin ang pasok sa mga eskuwelahan, tanggapan ng gobyerno at maging ang mga biyahe ng eroplano sa Zamboanga City International Airport.