15 Pinoy seamen na dinukot ng mga pirata nasagip

MANILA, Philippines - Nasagip ng puwersa ng Nigerian Navy ang 15 tripulanteng Pilipino na kabilang sa sakay ng na-hijack na Greek-owned tanker sa Nigeria noong nakaraang buwan.

Ayon sa report na tinanggap ng Department of Foreign Affairs (DFA) mula sa manning agency ng barkong M/T Norte na kinalululanan ng mga Pinoy seamen, bumiyahe na kahapon ang mga Pinoy crews patungong Lagos matapos na masagip at dinala sa Nigerian Naval Base sa Warri, Delta State para sa debriefing.

Sinabi ni Foreign Affairs Spokesman Raul Hernandez na pawang nasa maayos na kalagayan ang 15 Pilipino at hindi sila sinaktan ng mga pirata. Sila ay nailigtas matapos na i-hijack ng mga armadong pirata ang kanilang sinasakyang barko noong Agosto 16.