Aplikasyon sa gun ban exemption sa Bgy., SK polls simula na

MANILA, Philippines - Binuksan na ng Commission on Elections ang aplikasyon para sa gun ban exemption kaugnay sa October 28 Barangay and Sangguniang Kabataan elections.

Ayon kay Comelec Chairman Sixto Brillantes, napagkasunduan sa en banc na hindi na sila maglalabas ng bagong resolution kaugnay nito bagkus ay ia-adopt na lamang ang kaparehong polisiya na ipinatupad noong May 13 mid-term polls.

Ito ay ang Comelec Resolution 9608 na nagbibigay ng gun ban exemptions kay Pangulong Noynoy Aquino, Vice President

Jejomar Binay, senators, Cabinet secreta­ries; Chief Public Attorney; chairpersons and commissioners of the Commission on Human Rights at iba pang constitutional bo­dies tulad ng Ombudsman, Deputy Ombudsman, investigators at prosecutors ng Office of the Ombudsman at Solicitor General.

Kabilang din sa exempted sa gun ban ang mga secretaries, undersecretaries, assistant secretaries, prosecutor general, Chief State Prose­cutor, state, regional, provincial at city prosecutors ng Dept of Justice; secretary, undersecreta­ries, assistant secretaries at internal security ng Office ng Secretary of the Interior and Local Government; commissioner at deputy commissioners, law and investigation division at intelligence division ng Bureau of Immigration; Bureau of Corrections, provincial and city jails at regular officers, members, and agents ng anumang law enforcement agencies, at maging ang private security personnel.

Nilinaw naman ni Brillantes na sa kabila nito, hindi otomatikong exempted ang mga ito bagkus kailangan nilang maghain ng request for renewal of authority to possess and carry firearms.