Ilang pari tumanggap ng tulong kay Napoles

MANILA, Philippines - May ilang alagad ng simbahan ang tumatanggap ng tulong mula sa tinaguriang pork barrel scam queen na si Janet Lim-Napoles.

Sa isang radio interview kay Lipa Archbishop Ramon Arguelles, ikinuwento niya na ilang pari, sakristan at ma­ging Chinese priests ang tinulungan at kinupkop ni Napoles sa kaniyang tahanan.

Kabilang aniya dito ang isang hindi pina­ngalanang pari na may malubhang sakit.

Nagulat aniya siya nang maglabasan ang mga ulat na si Napoles ang itinuturong utak ng bilyong pisong pork barrel scam.

Naniniwala naman si Arguelles na marami sa mga alagad ng simbahan ang tumatanggap ng tulong ng hindi na inaalam kung saan nagmula ang tulong.

Mayroon din namang maituturing na “subjectively guilty” sa pagtanggap ng donasyon tulad halimbawa na alam namang jueteng lord bagamat matulungin sa simbahan ay tinatanggap pa rin ang donasyon.

Aniya, tulad ng kaso ni Msgr. Josefino Ramirez na matagal nang tumutuloy sa tahanan ng kaibigan niyang si Napoles dahil sa sakit nito at matagal nang sumasailalim sa regular na dialysis.