Loren matatag sa taas!

MANILA, Philippines - Ilang araw na lang ang nalalabi bago maghalalan, tuluyan nang pumaimbulog ang reeleksiyunistang si Senadora Loren Legarda sa pinakahuling survey ng Pulse Asia kung saan nakapagtala siya ng halos 52 porsiyentong marka na mataas na limang porsiyento sa sumusunod sa kanya.

Sa naturang survey ay nakita rin kung paano lumupaypay at bumulusok sa pang-apat na puwesto na lamang ang reeleksiyunis­ta ring si Sen. Alan Peter Ca­yetano na umano’y solong ikinakampanya sa Taguig ng kanyang asawang si Mayor Lani Cayetano, sa kabila ng pagkakaroon ng Team Pnoy ng labin­dalawang kandidato sa pagkasenador.

Sa pagdaraos ng naturang survey na ginanap sa pagitan ng Abril 20-22 ng kasalukuyang taon ay naging kapansin-pansin ang pagkalat ng mga text messages na nagsasabing si Legarda ay nag-akda ng panukalang naglalayong babaan ang suweldo ng mga sundalo at pulis.

Ang naturang mapanirang mensahe sa text ay agad namang pinabulaa­nan ng mismong pamu­nuan ng Senate Bills and Index Committee na nagpalabas pa ng isang sertipikasyon na walang panukalang batas na naglalayong ibaba ang suweldo ng mga natu­rang kawani ng pamahalaan ang naisampa sa kanila.