Erap ’wag idawit sa Chiz-Heart issue

MANILA, Philippines - Kinastigo ni United Nationalist Alliance (UNA) senatorial bet San Juan City Rep. JV Ejercito Estrada  ang grupong nasa likod ng pagdadawit sa pangalan ni dating Pangulong Joseph Estrada sa Chiz-Heart Evangelista brouhaha.

Ayon sa batang solon, masyadong busy ang kanyang ama sa sarili nitong pangangampanya sa lungsod ng Maynila para makisawsaw pa sa nasabing isyu.

Wala rin umano sa character ng ama ang pagiging “bengador” at pamemersonal at ito ay alam ng lahat maging ng mga taong simbahan at mga naging kabahagi ng EDSA Dos.

Ayon pa kay Rep. Estrada, dapat ay tigilan na  ni Sen. Escudero ang pagtuturo sa kanyang ama na nasa likod ng paglalantad ng tunay niyang pagkatao dahil ang senador ang nang iwan sa kanyang ninong noong 2010 election kaya minumulto ito ng kanyang mga ginawa o baka mayroon siyang kasalanan sa ibang tao.

Ipinagtataka rin ng mambabatas kung bakit ang kanyang ama na lamang ang laging nakikita ng senador sa tuwing mayroong problemang dumarating sa sarili nito.

“Sa ganang akin, kung anuman ang problemang dumarating sa atin, baka mas magandang sa halip na maghanap  sa ibang kapwa na matuturong maysala, baka mas mabuting tingnan ang sarili at tanungin saan nagkamali, Holy Week ngayon napakainam ng pagkakataon na ito para mag-reflect sa sarili at humingi ng kapatawaran sa Maykapal at sa ating kapwa” ayon pa kay Estrada.