Bro. Eddie umangal sa ‘5-6’

MANILA, Philippines - Kinalampag kahapon ni Bro. Eddie Villanueva ang gobyerno laban sa pamamayagpag ng mga hindi makatarungang lending practices sa bansa katulad ng 5-6. Ayon kay Villanueva, hindi pa rin natatapos ang kultura ng “kapit sa patalim” lalo na sa mga mahihirap na tumatangkilik sa mga nagpapa-5-6.

Sa kabila aniya ng mataas na interes walang magawa ang mga nais mangutang sa mga “loan sharks” dahil karamihan sa mga mahihirap ay wala namang access sa mga legal na lending institutions o hindi sila kuwalipikado na mangutang sa bangko na kalimitan ay may hinihinging collateral. Kalimitan din aniyang nabibiktima ng mga loan sharks ang mga magulang na nais pag-aralin ang ka­nilang mga anak na palaging kinakapos sa gastusin sa pagpasok sa eskuwelahan.

Sa kaso ng 5-6 umaabot sa 20 porsiyento ang ipi­napatong na tubo na pinapatulan naman ng mga nais mangutang dahil na rin sa ka­walan ng pera at desperasyon. Naniniwala si Villanueva na may magagawa ang gobyerno at isa na rito ang pagbuhay sa Anti-Usury Law kung saan ipinagbabawal sa nasabing batas ang pagpapataw ng masyadong mataas na tubo.