MANILA, Philippines - Dalawang bata ang nasawi makaraang aksidenteng mahulog sa isang dike sa Brgy. Suba, La Paz, Iloilo.
Kinilala ni National Disaster Risk Reduction and Management Council (NDRRMC) Executive Director Benito Ramos ang mga nasawi na sina Janie Salvador, 5 anyos at Princess Castor, 4.
Ang dalawang bata ay huling nakitang buhay habang nangunguha ng kuhol at suso sa dike noong Setyembre 22 subalit hindi na nakauwi pa.
Nitong Setyembre 23 ay narekober ang bangkay ng biktimang si Salvador matapos mapadpad may 400 metro ang layo sa dalampasigan ng Sitio Singcalang, Brgy. Balcon Meliza, Jordan, Guimaras.
Nitong Huwebes bandang alas-5:30 ng umaga ay lumutang naman ang bangkay ni Castor sa katubigan ng Brgy. San Isidro, La Paz, Iloilo City.