Bagyong Igme nagbabanta

Manila, Philippines -  Tuluyan ng naging ga­nap na bagyo ang binabantayang active low pressure area (LPA) na namataan sa Aparri, Cagayan.

Ayon kay Aldczar Aurelio, PAGASA weather forecaster, alas-10 ng umaga nang maging ganap na bagyo ang nasabing LPA na tinawag na Bagyong Igme.

Dahil dito, itinaas na sa public storm warning signal no. 1 ang Isabela at Cagayan. 

Base sa weather advisory ng kagawaran, hu­ling namataan si Igme sa layong 280 kilometro sa silangan timog-silangan ng Aparri, Cagayan at tinatahak ang direksyong pa-kanluran. 

Taglay ng bagyo ang lakas ng hangin na aabot sa 55 kilometro kada oras (kph) malapit sa gitna. 

Inaasahang mapapa­lakas ng bagyong Igme ang Habagat, na magdadala ng kalat-kalat na pag-ulan sa Luzon at Kanlurang Visayas. 

Asahan din na magdadala ng aabot sa 5-15 milimeter per hour na dami ng ulan ang nasabing bagyo.

Nag-isyu na rin ang PAGASA ng gale war­ning para sa mga maliliit na sasakyang pandagat na huwag munang pumalaot dahil sa malakas na alon. 

Gayundin, sa mga ma­babang lugar at gilid ng bundok na mag-ingat sa posibleng pagbaha at pagguho ng lupa.