GMA hindi pa tiyak na hindi ulit makukulong
MANILA, Philippines - Inihayag ni Senator Francis “Chiz” Escudero na hindi pa sigurado na hindi na muling makukulong ang dating Pangulo na ngayon ay Pampanga Congresswoman Gloria Macapagal-Arroyo dahil naman sa kasong plunder na nakasampa sa Sandiganbayan.
Ayon kay Escudero, posibleng makulong muli si Arroyo sa sandaling magpalabas ng warrant of arrest ang Sandiganbayan.
Pero aminado si Escudero na hangga’t wala pang bagong warrant of arrest si Arroyo ay walang dahilan upang ikulong ito.
Inamin din ng senador na ikinagulat niya ang pagpapahintulot ng korte na makapag-piyansa si Arroyo.
Ayon naman kay Senator Panfilo “Ping” Lacson, ang pagpayag ng korte na makapag-piyansa ang dating Pangulo ay nagpapakita na mahina ang kasong electoral sabotage na isinampa laban dito.
Dapat umanong maging aral sa Department of Justice at Commission on Elections (Comelec) ang pangyayari na hindi sila makakapaghain ng isang malakas na kaso sa pamamagitan ng press release at media interviews.
- Latest
- Trending
