Kapag 'guilty' si Corona, Depensa aapela
MANILA, Philippines - Sakaling guilty ang ilabas na hatol ng impeachment court laban kay Supreme Court Chief Justice Renato Corona, nagpasakalye na ang kampo nito na kanila ng pinaghahandaan ang posibleng pag-apela sa Kataas-taasang Hukuman.
Muling iginiit ni defense lead counsel Serafin Cuevas na walang sinasabi sa batas na “final and executory” na ang desisyon ng Senado sa impeachment case.
“Wala pong ganoon nakalagay sa Konstitusyon. Now, kung wala po iyon, parang another remedyo. We have no other alternative but to result to certiorari. I’ll ask for a petition for review,” ani Cuevas.
Sa ngayon ay may nakabinbin pang petisyon si Corona sa SC na humihiling na ipatigil ang paglilitis dahil sa umano’y pag-abuso ng Senado sa kapangyarihan nito.
Una nang nagbabala ang ilang senator-judges na maaring magkaroon ng constitutional crisis sakaling makikialam ang Korte Suprema sa trabaho ng Senado.
Ayon pa sa retired justice, bagama’t nasa kapangyarihan umano ng Kongreso ang pagtalakay at paghatol sa impeachment case, hindi umano nangangahulugang wala ng kapangyarihan dito ang SC.
“I hope patawarin nila ako, because hindi po naman maaring gawin na pikit-mata na lang at tanggapin na lang kung ano iyan,” giit ni Cuevas.
Kaagad namang nagpahayag ng pagkadismaya ang House prosecution panel sa nasabing posisyon ni Cuevas.
- Latest
- Trending
