Divorce Bill binuhay

MANILA, Philippines - Gustong buhayin ni Sen. Pia Cayetano ang divorce bill matapos ang ginawang pag-amin ng dalawang senador na hiwalay na sila sa kani-kanilang asawa.

Ayon Cayetano, napapanahon na ang pagtalakay sa divorce bill lalo pa’t mas traumatic sa Pilipinas ang pakikipaghiwalay sa pamamagitan ng annulment.

Ginawa ni Cayetano ang pahayag matapos aminin nina Sens. Koko Pimentel at Chiz Escudero na hiwalay na sila sa kani-kanilang asawa.

Paliwanag niya, mas mahirap ang proseso ng annulment dahil kailangan pang magsisihan ng mag-asawa at palabasin na walang kasal na nangyari sa kabila ng mga taon na kanilang pinagsamahan.

Hiwalay na rin sa kaniyang asawa si Cayetano at ipinapa-annul ang kaniyang kasal.

Sinabi ni Cayetano na dapat talagang tanggapin na nagmahalan din naman ang isang mag-asawa pero dumating ang panahon na hindi na sila magkasundo kaya kinakailangan ng maghiwalay.